(Madda Oduu ABO/MOA/Caasaa 19,2009) Odeessi nu gahe akka ifa godhutti lammiileen Oromoo Obbo Abdurashiid Ibraahimii fi Obbo Hassan Ibraahim Tuulee je’aman dararaa mootummaan wayyaanee irraan gaheen lubbuun dabaranii jiru. Godina Harargee Bahaa Ona Burqaa Tirtiratti dhalatee ka guddate sabboonaan Oromoo Obbo Abdrurashiid Ibraahim yeroo gara garatti sababa ABO deeggarta je’uun hidhamee dararamaa ture.
Dararaa diinni irraan gaheen, dhukkubsate yeroo lama wal’aasaa dhoosatiin yaalamuu isaa kan ifa godhe oduun kun Caamsaa 8/2009 miidhaa irra gahe irraa bayyanachuu dadhabee umrii isaa ganna 38tti du’aan addunyaa tana irraaa booqate. Obbo Abdurashiid Ibraahim diinaan wayta qabamee turetti hiccitii ABO baasuu dide jedhamee wayyaanota diina ummata Oromoo ta’aniin akka malee dhaanamuu isaa illee odeessi MOA dabalee addeessa. Obbo Abdurashiid Ibraahim tikfataa bulaa akka ta’es hubameera.
Oduuma walqabatee nu gaheen, jiraataa Ona Baddannoo Araddaa Tortoraa Guddaa ka tahe abbaan joollee 7 obbo Hassan Ibraahim Tuuleetis haaluma walfakkaatuun ajjeefamuu isaatu gabaafame.
Hojii daldalaan jiraataa ka ture sabboonaan Oromoo obbo Hassan yakka biraa hojjatee kan ajjeefame osoo hin taane ABO deeggarta maqaa je’u qofaan dharaan himatamee hidhaa keessatti dararamaa erga tureen booda miidhaa isa irra gaheen addunyaa kana irraa du’aan boqotee jira. Qabeenyi isaa kanneen akka dukkana fi konkolaats diinaan saamamanii jiru.
Sirni wayyaanee ummata Oromoo diina isa duraa godhatee fixaa akka turee fi jiru beekkamaa dha. Maatii fi firoottan Oromoota dhumataniin jajjabaadhaa jechaa lubbuu isaaniif ammoo rabbiin jannata haa kennuu jenna.
********
Godina Harargee Bahaa Ona Malkaa Bal’oo jiraataa Araddaa Miinyaa ka tahe lammiin Orommoo Sheek Aammad je’aman bulchaa gandaa ka tahe ergamaa wayyaanee Aammad Alii je’amuun ajjeefaman.
(Madda Oduu ABO/MOA/Caasaa 19,2009) Caamsaa 11/2009 bulchaan gandaa lukkeen wayyaanee Aammad Alii je’amu Sabboonaa Oromoo Sheek Aammad je’aman ati deeggaraa ABO ti; meeshaa ABOn sitti kenne dhoysitee baasi maqaa je’uun tumiinsa hamaa erga irratti raawwateen booda, lubbuu isaa galaafate.
Sheek Aammad nama hidhata siyaasaa tokko illee hin qabne tahuu kan ifa godhe oduun nu gahe sirni wayyaanee akkuma aadaa isaa karaa ergamtoota isaan ummata Oromoo dhabamsiisuuf duula dhaabbataa adeemisaa jiru kan itti fufe ta’uu mul’isa jechuun addeesse.
Jaleen diinaa Aammad Alii je’amu Araddaa Miinyaa keessatti nama nagaa Sheek Aammad ajjeese kun hanga ammatti toohannaa jala akka hin oolinis odeessi kun dabalee addeessa.
MOA
